IR edelen tvmben wes lant ir úch gerne toren triegen·
die mit ir valsche rilich gv̊t úch kvnnen abe erliegen·
sinnelose giegen· hant in ir herzen die vernvnst·
dc si den kúnsterichen stelnt ir rede vnd ir gedoͤne·
darvmbe si vil dike enpfahent hoher gabe loͤne·
der tieuel in gehoͤne· der vf si kere sine gvnst·
wer ich edel ich tete vngerne eime iegelichen toren lieb·
der die meister als ein dieb ir kv́nste wolte rǒben·
ein herre moͤhte wol erkennen blůmen vnder schǒben·
owe dc ich ir manigen sihe an witzen also tǒben·
dc er wil gelǒben· dc eigen si verstolnú kvnst·