IR pfaffen vnd ir ritter tribent von v́ch nît·
ir pruͤfent anders groͤsser vngenade zit·
ir svnt gedenken rechte wies vmb v́ch lit·
der pfaff ritter buman die drie die soͤltin sin gesellen·
der buman sol dem pfaffen vnd dem ritter ern·
so sol der pfaffe den buman vnd dem ritter nêrn·
vor der hêlle sol der werde ritter wêrn·
dem pfaffen vnd dem buman die in tv̊n icht wellen·
nv dar ir edelen werden drie gesellen·
Stol vnd swert wênt ir ein ander helfen wol·
so wirt dv́ kristenheit von v́ch genaden vol·
Stol vnd swert der pflůg tůt alles das er sol·
sint ir mit trú ein ander bi· v́ch kan nie man gevêllen·