IR froͤit úch ivnge vn̄ alte·
der meie mit gewalte·
den winder hat v̾dꝛvngen·
die blv̊men ſint entſpꝛvngē·
wie ſchone dú nahtegal·
vf dem riſe·
ir ſvͤſſe wiſe·
ſinget wūneklichē ſchal·
Der walt ſchone lǒbet·
min mv̊ter niht gelǒbet·
der mich mit einem ſeile·
ſpꝛach ein maget geile·
bvnde mir einē fůs·
zv̊ der linden·
mit den kindē·
vf den anger ich da mv̊s·
Das gehoꝛt ir mv̊ter·
ia ſwinge ich dir dc fůter·
mit dem ſchippfē vber den rugge·
dv vil kleine graſemvgge·
wa wilt dv huppen hin·
vs dem neſte·
ſitze vn̄ beſte·
mir den ermel wider in·
Mv̊ter mit dē ſteken·
ſol man iv die rūzen reken·
die alten als ein ſvmber·
noch húre ſit ir tvmber
danne ir von ſpꝛvnge vart·
ir ſit tot·
vil kleiner not·
iſt iv der ermel abe gezart·
Vf ſpꝛanc ſi vil ſnelle·
dv tieuel vs der helle·
ich wil mich din gar v̾zihen·
dv wilt úbel gedihen·
mv̊ter ich lebe e doch
ſwie iv trǒme·
bi dē ſǒme
durh den ermel gat ein loch·