IN ſo hoher ſwebender wunne·
ſo geſtv̊nt min h̾ze an froͤiden nie·
ich var als ich fliegen kvnne·
mit gedanken iem̾ vmbe ſie·
ſit dc mich ir troſt enphie·
der mir dvr die ſele min mittē in dc h̾ze gie·
Swas ich wūnekliches ſchǒwe·
das ſpil gegen der wūne die ich han·
lvft vn̄ erde walt vn̄ ǒwe·
ſvlnt die zit der froͤide min enphan·
mir iſt komē ein hv́gender wan·
vn̄ ein wūneklicher troſt des min mv̊t ſol hohe ſtan·
Wol dem wūneklichen mere·
dc ſo ſůſſe dvr min oꝛe erklanc·
vn̄ der ſanfte tv̊nder ſwere·
dú mit froͤiden in min h̾ze ſanc·
da vō mir ein wūne entſpꝛāc
dú voꝛ liebe alſam ein tǒ mir vs vō den ougen dꝛanc·
Selig ſi dú ſvͤſſe ſtvnde·
ſelic ſi dú zit der werde tac·
do dc woꝛt gie vō ir mv̄de·
dc dem herzen min ſo nahen lag·
dc min lip vō froͤiden erſchꝛac·
vn̄ enweis vō liebe ioch was ich vō ir ſpꝛechen mac·