ICh wil ivngen kinden raten·
dc si balde froͤwen sich·
da wir ê den rifen traten·
da ist nv gar wūneklich·
da entspringent blv̊men vnd kle·
kalde rifen vnd sne·
sint zergangen aber als e·
Ich wil miner frowen mv̊ten·
dc si mir genedic si·
der vil reinen der vil gv̊ten·
wer ich gerne nahe bi·
liesse eht mich ir vngefuͤger nît·
der mir also nahe lit·
froͤiden si mich rǒbet zaller zit·
Werder reiner wibe minne·
machet froͤiderichen mv̊t·
des bin ich wol worden inne·
dc nie wūne wart so gv̊t·
als ich mich versinnen kan·
son enwirdet niemer man·
rehte fro der minnen nie began·
Mines libes ǒgenweide·
dast dú liebú frowe min·
sol ich iemer komen von leide·
dc mv̊s an ir hulden sin·
dc si spreche ich bin dir holt·
dc wer mir ein richer solt·
vnd nême es fúr des keisers golt·