ICh wil ivngen kindē raten·
dc ſi balde froͤwen ſich·
da wir ê den rifen traten·
da iſt nv gar wūneklich·
da entſpꝛingēt blv̊mē vn̄ kle·
kalde rifen vn̄ ſne·
ſint zergangē aber als e·
Ich wil miner frowen mv̊ten·
dc ſi mir genedic ſi·
der vil reinen der vil gv̊ten·
wer ich gerne nahe bi·
lieſſe eht mich ir vngefuͤger nît·
der mir alſo nahe lit·
froͤiden ſi mich rǒbet zaller zit·
Werder reiner wibe mīne·
machet froͤiderichen mv̊t·
des bin ich wol woꝛdē īne·
dc nie wūne wart ſo gv̊t·
als ich mich v̾ſinnē kan·
ſon enwirdet niem̾ man·
rehte fro der mīnen nie began·
Mines libes ǒgenweide·
daſt dú liebú frowe min·
ſol ich iemer komē vō leide·
dc mv̊ſ an ir huldē ſin·
dc ſi ſpꝛeche ich bin dir holt·
dc wer mir ein richer ſolt·
vn̄ nême es fúr des keiſerſ golt·