Ich wil die vil gv̊ten vlehē·
vmb ein ding dc ich doch han·
ī gewalt vn̄ in gew̾·
dc ſi lihe mir ze lehē·
were dc willeklich getā·
ſo enmoͤhte ein ganzes her·
mir an froͤidē niht gezern·
alleſ trurē wer mir wilde·
fluge ich niht dc wer vnbilde·
w̾ ſolt ir die mīneklichen milte irwern·
Sine mag mirſ niht v̾zihē·
wirt min rede vō ir vernomē·
wā es iſt ir ane ſchaden·
wil ſi mirs ze zinſe lihen·
ſo ſol ir min herze komē·
mit liebe vúr zins geladē·
ſpꝛich vꝛowe es iſt d̾ wille min·
kanſtu mich mir woꝛtē geſtē·
vúr die ſchoͤnſtē vn̄ die beſtē·
lob ich dich dc iſt mī reht dú ere iſt din·
Doch enſoltv mirs niht ſendē·
ich wil ſelbe zv̊ dir dar·
da wirt es vns beiden ſleht·
ratet wie ſol ichs volendē·
dc ich in ir hvldē var·
wil ſi ich tv̊n ir mannes reht·
mine hende valde ich ir·
růchet ſis ſo ſol ich gahē·
vn̄ ſol es mit kvſſe enpfahen·
mit ir gerē ſolſ ſis ſelbe lihē mir·
Si enwil an mir niht erwīdē·
ſi nimt mir ī minē tagē·
dike min̾ vꝛoͤidē ſpil·
mag ich niht genade vindē·
ſo wil ichs ir gvͤte klagē·
dú hat hoher trúwe vil·
der vrteil ich g̾ne kvr·
ſi nimt mir h̾ze vn̄ ſinne·
d̾ mirs riete ich nême ir mīne·
e ich ane wer lib vn̄ gv̊t v̾lur·
Swer nv wolte tegedīgē·
dē wolt ich deſ ſagē dank·
vur reht ich genadē ger·
wer moͤht vb̾ein vns bꝛingē·
frowe mīne es tv̊ din ſwank·
nv ſolt dv deſ ſin mī wer·
dc ich dir bin vnd̾tan·
maht dv diſen ſtrit geſtellē·
vn̄ zein and̾ vnſ geſellen·
alleſ liebeſ wil ich ir niem̾ abe gan.
Ein blic ein wanc·
froͤide vn̄ leit
hant mir gegeben·
ir ǒgē ſwanc·
gab froͤidē kleit·
dc zart enneben·
zwei ir blikeſ wēkē·
ſwederſ ſi wil·
ſoꝛge oder ſpil·
dc kan ſi ir vꝛv́nde ſchenken·
Nie valſche gv̊t·
ze dem lůd̾ kam·
ſo ſnellekliche·
als mī mv̊t·
ſi vlúget an·
genendekliche·
er zir h̾zen boſſet·
vil māgē ſtoz·
es iſt wūder gros·
dc er ſi niht vber ſtozet·
So geil wc ie·
mins h̾zē ſin·
das māgen man·
des wūdert wie·
ſi in vuͤre hin·
ſit er niht zan·
iſt dc er niht zuket·
dē ie ſo wilt·
ſin fluch gezilt·
wc dc der zú ir flucket·