Dv́ vil selderiche machet·
dc min herze in swere wachet·
swenne es solde in růwe sin·
hohgemvͤte mir verswindet·
swanne in sorgen sich verwindet·
gar nach ir dc herze min·
sol mir liebe kvmber machen·
sol mir trúwe froͤide wern·
wie gezimt ir denne lachen·
wils ir frúnde also verswachen·
si enwelle mich ernern·
Vs ir mv̊t vnd vs ir herzen·
rútet kvmber vnd smerzen·
min vil libú frowe gv̊t·
froͤide seit si dar dú here·
seht da wahset selde vnd ere·
ich nam ǒch da hohen mv̊t·
sa begvnde si mich krenken·
wan si nam ir froͤide mir·
ich enmaht ir niht entwenken·
ie doch solte si bedenken·
hat ich froͤide ich gebes úch ir·
Genade machet mir gedingen·
die si hat mac gelingen·
wan sine mag verborgen sin·
genade mag mir froͤide machen·
vroͤide nieman sol verswachen·
frowe hant genade min·
gebet mir úwer froͤide ein kleine·
seht so hoͤhet sich min leben·
habt ǒch ir mit mir gemeine·
froͤide ensol niht wesen eine·
wan sol frúnden froͤide geben·
Mich wundert ob si mich meine·
ist des iht es ist doch kleine·
des ich iehen von schulden mv̊s·
sit ir lachen noch ir ǒgen·
weder offenlich noch tǒgen·
mir nie gaben frúndes grůs·
minne ich bin din wild enteren·
dich an mir wie stet din mv̊t·
solt die dine iemer eren·
solt si liebi gen dir leren·
tv̊r niht we si ist doch gv̊t·
Es wer besser ich verdurbe·
denne ob ich ir leit erwurbe·
dú mit liebe mich betwanc·
minne dv bit si mit gvͤte·
das si troͤste min gemvͤte·
min kvmber ist gar zelang·
froͤide in iamer si mir keret·
swies ein hoh gemvͤte treit·
we wer hat si dc geleret·
mir tv̊t we swc si verseret·
doch ist mir min truren leit·