Ich wil den winter enpfahen mit gesange·
alle swigen stille die kleinen vogellin·
ich en wart noh nie so von sime getwange·
dc ich dvr in lieze die minne froͤide sin·
des danke ich doch der vil lieben frowen min·
ir roter mvnt ir roͤselehtes wange·
ir guͤte vnd ir wol liehtvarwer schin·
zieret ein lant wol al vmbe den rin·
Wol mich wol mich iemer mir ist wol ze mv̊te·
dc die argen schalke ze mir tragent has·
si vnerent sich doch so minne ich die gv̊te·
wand min got selber noh nie vergas·
do er schůf merket alle wol was·
ein wib dú mich het in ir hv̊te·
dc ich mir ze lebenne gan· bas vnd ie bas·
des ensih ich an schalkhafter diet niht dc·
Moͤhten si dem walde sin lǒben verbieten·
vnd der heide ir blvͤien dc were getan·
moͤhten sis geraten wie gerne si dc rieten·
dc man gv̊te froͤide vber al mvͤze lan·
so mvͤze man sam die wolue sich gehaben·
ich wil mich gv̊ter froͤide nieten·
froͤide vnd ere die lat ú niht versmahen·
als gebot mir dú liebe wol getan·