Ich wil den wint̾ enpfahē mit geſange·
alle ſwigē ſtille die kleinē vogellin·
ich en wart noh nie ſo vō ſime getwange·
dc ich dvr in lieze die mīne froͤide ſin·
deſ danke ich doch d̾ vil liebē frowē min·
ir roter mvnt ir roͤſelehtes wange·
ir guͤte vn̄ ir wol liehtvarwer ſchin·
zieret eī lant wol al vmbe dē rin·
Wol mich wol mich iem̾ mir iſt wol ze mv̊te·
dc die argē ſchalke ze mir tragent has·
ſi vnerent ſich doch ſo minne ich die gv̊te·
wand min got ſelb̾ noh nie v̾gas·
do er ſchůf m̾ket alle wol was·
ein wib dú mich het in ir hv̊te·
dc ich mir ze lebenne gan· bas vn̄ ie bas·
des enſih ich an ſchalkhafter diet niht dc·
Moͤhtē ſi dē walde ſin lǒbē v̾bietē·
vn̄ d̾ heide ir blvͤien dc w̾e getan·
moͤhtē ſis geratē wie g̾ne ſi dc rietē·
dc man gv̊te froͤide vb̾ al mvͤze lan·
ſo mvͤze mā ſam die wolue ſich gehabē·
ich wil mich gv̊t̾ froͤide nieten·
froͤide vn̄ ere die lat ú niht v̾ſmahē·
alſ gebot mir dú liebe wol getan·