Ich wil allē lútē· betútē· mis h̾zē klage·
vn̄ wie groſſē kvmb̾ ich tvmb̾ nv trage·
wie mich ſoꝛge twīget· vn̄ ſinget doch mir der lip·
ſeht dc mv̊ſ ich lidē· dvrh midē eī wib·
deſ mv̊s ich den iamerſchꝛikē
leid̾ vndertenig ſin·
ich lige ī ir mīnē ſtriken
dc iſt an mir woꝛdē ſchin·
ſi kan ſendē ſmerzē vs h̾zē v̾tribē wol·
roſe ob allē wibē mā ſi nēnen ſol·
Wa iſt nv dú ſchoͤne· ich doͤne· vn̄ nige ir gar·
ich wil ab̾ gruͤzen die ſúͤzen· nemet war·
ſchone mit geſange· ſwie lāge ich ir froͤmde ſi·
doch ſo hat ir ivgēde· vil tvgēde da bi·
hat ſi gvte ein michel wūder
in dē h̾zen zaller ſtvnt
vn̄ ſi doch voꝛ vs beſvnder
mir dc h̾ze hat v̾wunt·
Si kan ſendē ſmerzē vs h̾zē v̾tribē wol·
roſe ob allē wibē mā ſi nēnen ſol·
Wenne ſvn ir ǒgē· mir tǒgē ze blike varn·
ḍvn̄ dú ſvͤze ivnge· mir ſwūge den arn·
vn̄ mich vmbevienge· ſo gienge mir ſoꝛge hin·
ſeht ſo wolt ich ſcheidē vō leidē den ſin·
wafena d̾ liebē ſtvnde·
wēne ſol ich die gelebē·
dc ich vō ir rotē mv̄de·
ſolte ein lieblich kúſſē nemē·
Si kan ſendē ſmerzē vs h̾zē v̾tribē wol·
roſe ob allē wibē mā ſi nēnen ſol·