ICh verklegte wol dú zit·
vnd die wunnebernden owe·
trôste mich min trut min frowe·
nach der sich min herze dike sent·
dv́ mir also liebe lit·
in dem herzen min behalden·
da si nieman kan verschalden·
si hat sich so lieplich dar gewent·
mir wart nie lieb als rehte wert·
si ist in mines herzen veste·
wol dú hêrste vnd ǒch dú beste·
sist der min wunsch vf erde gert·
Lachelich ein lôser blic·
vs ir liehten spilnden ǒgen·
zarte minneklichen tǒgen·
sach ich lihten in mins herzen grunt·
do kan mir von vroͤide ein stric·
vnd ein minnegernder smerze·
als lieblich in das herze·
dc es wart von rehter liebe wunt·
do ich sach ir mvnt dur lúhtig rot·
alse froͤideberes lanchen·
lieblich vnd froͤlich machen·
do gert ich nach liebe in wernde not·
Wer gesach ie wibes lib·
alse schôn vnd 208v alse claren·
vnd so lieplich wol gebaren·
vnd so gar in wibes gvͤte gůt·
si ist gar ein wiplich wib·
nach dem wunsche wol gesteliet·
selde hat sich zir gesellet·
si hat kúsche zuht vnd reinen mv̊t·
io mein ich mins herzen vngemach·
nach der ich mit gerndem sinne·
in der minne heritze brinne·
so wol mich das ichs ie gesach·