Ich sv̊chte gv̊ter frúnde rat·
der aller beste hat mir noch geraten niht ze wol·
ia enweis ich war vmbe er das lat·
min herze mein ich dc vor allen frúnden raten sol·
es riet dien sinnen das si mich·
verleiten vnd selbe sich·
an ein vil tvgentriches wib·
dú ist mir lieber danne ich ir darvmbe truret mir der lib·
Mir wont vil vngemaches bi·
min aller beste froͤide lit ǒch an der gv̊ten 66r gar·
swie vngenedig si mir si·
so wil edoch dc herze min niender anders danne dar·
es hat mich gar dvr si verlan·
vnd wil ir wesen vndertan·
wie han ich svs an im erzogen·
es tv̊t der tohter vil gelich dv́ liebe mv̊ter hat betrǒgen·