Ich ſpúr ein wūder dur dú lant·
in gelfˢ gruͤner varwe ſchin·
es hat fůs ǒgē noch die hant·
vn̄ wil doch bi dē lútē ſin·
beide armē vn̄ richē·
es bindet manigē âne bant·
es vert die tv̊nǒwe vn̄ dē rin·
eſ treit dē h̾ren ir gewant·
vn̄ trinket mit dē vúrſten win·
es kan bi dē frowē ſlichē·
es ſtirbet hie vn̄ wahſet doꝛt eſ vert ſpate vn̄ frǒ·
es ſleich vf einē bǒn d̾ erſten megede zv̊·
es ſlůg d̾ w̾lte vierden teil·
vn̄ ſleht noch ǒch·
vil manigē gǒch·
rint ane hoꝛn·
es hat vil manig mā ſin heil·
ſinen lib ſine ſele vō im v̾loꝛn·
ſage an wem mag eſ ſich gelichen·
Wie hoͤfſche lúte habe d̾ rin·
dc iſt mir wol mit ſchadē kvnt·
ir hvbe ir har ir keppelin·
erzeigēt núwer fúnde vunt·
criſt in helfe ſo ſi nieſen·
es mag wol curteiſ pouel ſin·
pittit mangier iſt in geſvnt·
ſtad vf ſtad abe in wechſet win·
in dienet ǒch des rineſ grvnt·
ich wil vf ſi gar v̾kieſen·
d̾ ýmelvnge hoꝛt lit in dē lvrlenb̾ge in bi·
in weis ir niend̾ einē d̾ ſo milte ſi·
d̾ den g̾nden teilte mite·
vō ſiner gebe·
die wile ich lebe·
ſin vꝛi voꝛ mir·
ir mv̊t d̾ ſtat vf ſolhen ſitte·
nv gib dv mir ſo gibe ich dir·
ſînen wellent niht v̾lieſen·
We dir vō zwet̾ Regimar·
dú núweſt māgen altē vunt·
dú ſpelteſt als ein milwe ein har·
dir wirt vs einē oꝛte eī pfv̄t·
ob din lieſſen dich niht trúget·
dir wirt vſ einē tage ein iar·
ein wild̾ wolf wirt dir ein hvnt·
ein gans ein gǒch ein trappe ein ſtar·
dir ſpīnet hirz dur dinē mvnt·
wa mit haſt dv dc erzúget·
ein lug dur dine leſpe ſam ein ſlehtú warheit vert·
dv haſt dien viſchen hv̊ſten krebſen ſat er wert·
bi dir ſo ſint dꝛú wūder tier·
dc iſt d̾ git·
has vn̄ nit·
dv doͤne dieb·
dv pꝛuͤueſt ane malz ein bier·
ſupf vs dir iſt ein leker lieb·
d̾ den h̾ren vil gelúget·