Ich kv́nde in dem done·
der tag wil schone·
wil vf sin·
swer tǒgen minne·
der beginne·
wachen des ist zit·
ich hoͤre vf den zwigen·
singende schrien·
vogellin·
der tag wil nahen·
hinnan gahen·
sol swer tǒgen lit·
ich warne also·
sprach der wahter in sorgen·
der merker dro·
lit in slafe borgen·
vf dirre mvre·
stan ich vnd trure· sere·
wc sol ich mere·
frúnde vnd viende sagen·
wan es wil schiere tagen·
Dú rede ein ritter·
duhte vil bitter·
da er lak·
bi einer frowen·
dú gie schowen·
zeinem vensterlin·
si sach vil vngernen·
den morgen sternen·
grawen tag·
dú wolken grise·
si sprach lise·
lieber herre min·
der wahter giht
er sehe des morgen schin·
des wene ich niht·
dien kleinen vogellin·
drǒmet vf esten·
des sternen glesten· trúget·
der wahter livget·
des er sich schamen mag·
wan es ist noh niht tag·
Der ritter vil sv̊sse·
mit liebem grůsse·
mangen kus
bot rotem mvnde·
kvrzer stvnde
do der wahter sweig·
er rief aber lute·
trut sich von trute
scheide sus·
dc valsche hůte·
pfandes iht mv̊te·
sa der ritter neig·
der frowen sin·
da schiet sich lieb mit leide·
vil manigen pin·
trůgen ir herzen beide·
svs kan dú minne·
mv̊t vnd sinne· teilen·
wunden vnd heilen·
der helt slǒf dur den hag·
alda luhte im der tag·