Ich sihe wol dc got wnder kan·
ein schoͤne wúrken vs wibe·
dc ist an ir wol schin getan·
wan er vergas niht an ir libe·
den kumber den ich mit ir tribe·
den wil ich gerne han·
zedú dc ich mit ir belibe·
vnd an ir min wille mvͤsse ergan·
min frowe sehe was si mir tů·
da stat dehein scheiden zv̊·
Si gedenke niht dc ich si der man·
der si ze kvrzen wilen minne·
ich han von kinde an si verlan·
dc herze min vnd al die sinne·
ich wart an ir nie valsches inne·
sit ich von erst si lieb gewan·
min herze ist ir gesinne·
vnd wil ǒch stete an ir bestan·
Min frowe sehe was si mir tů·
da stat dehein scheiden zv̊·