ICh klage dir edelú frowe here·
dc ich froͤiden eine stan·
von dinen schulden dc verkere·
troͤste mich vil senden man·
ich lebe in seneclicher nôt·
sit min ǒgen lachen sahen
dinen lieben mvnt so rôt·
Ich wande ich iemer solde lachen·
do ich dich frowen lachen sach·
min mv̊t begvnde an froͤiden swachen·
do min herze mir veriach·
es mvͤse din gevangen sin·
ân vrlob schiet es von mir balde
zv̊ dir libú frowe min·
Rosen rot ist ir dc lachen·
der vil lieben frowen min·
was kvnde er wunders an ir machen·
der ir gab so liehten schin·
si ist mins herzen oster spil·
iemer mere vnz an min ende
min herze von ir niht en wil·