Ich horte iv so vil tvgende iehen·
dc ú min dienst iemer ist bereit·
het ich úwer niht gesehen·
es schate mir an miner werdekeit·
ich wil iemer deste túrre sin·
vnd bitte úch selig frowe gv̊t·
dc ir ivch vnderwindent min·
ich lebte gerne kvnde ich leben·
nv bin ich tvmb min wille ist gv̊t· nv svlt ir mir die mâsse geben·
Kvnde ich die mâsse als ich niene kan·
so were ich in der welte ein selic wib·
ich tůn als ein wol redender man·
dc ir so hohe túret minen lip·
nv bin ich doch tvmber danne ir sit·
wc dar vmbe doch wil ich scheiden den strit·
tv̊t ir alrerst des ich úch bitte·
lerte ir mich der manne mv̊t· so lere ich úch der wibe sitte·
Wir wellen dc dú stetekeit·
iv gv̊ten wiben gar ein krone si·
kvnnet ir mit zúhten sin gemeit·
so stent lilen wol den rosen bi·
nv merkent wie der lilie ste·
der vogelline singen· dar vnder blv̊men vnd kle·
michels bas stat iv frowen schoͤner grůs·
ivwer minneklicher redender mvnt· machet dc man kússen mv̊s·
IR man fragent wer vns wol behage·
der úbel erkennen kan vnd gvt·
vnd ie dc beste von vns sage·
den sin wir holt ob ers mit trúwen tůt·
kan er zerehte ǒch wesen fro·
dc er gedenket zemâsse weder nider noch zeho·
so tůt er des das herze gert·
welh wib verseit dem einen vaden· gv̊ter man ist gůter siden wert·