ICh hoͤre ime maniger eren iehen·
der mir ein teil gedienet hat·
der im in sin herze kan gesehen·
an des genade sůch ich rat·
dc er mirs reht erscheine·
nv fúrhte aber ich dc ers mit valsche meine·
tete er mir noh den willen schin·
hete ich iht liebers danne den lib des mvͤste er herre sin·
Wie kvmt dc ich so wol verstan·
ir rede vnd si der miner Niht·
vnd ich doch grosser swere niht en han·
wan dc man mich fro dar vnder siht·
ein ander man es liesse·
nv volge aber ich swie ich es niht geniesse·
swc ich dar vmbe swere trage·
da spriche ich niemer v́bel zv̊ wan so vil dc ich es klage·