Ich han ie gedaht wie ein wib wesen solte·
so dc ich mvͤse wúnschen ir libes vnd ir sitte·
vnd ich si danne mir selben haben wolte·
so dc ich mine wnne hete da mitte·
so weis ich ein wib also gar minneclich·
dc minem wnsche nie wib wart so gelich·
sich hat got wol an ir schoͤne beweret·
swie ich doch si von ir minne vnsanfte erveret·
Ir lip vnd ir ere das ist alles reine·
o we das ich si froͤmden mv̊s vnd sol·
welt ir das min herze dc niht weine·
so man der gv̊ten gedenket also wol·
so kvme ich vor liebe in so we tv̊nde not·
das man mich vil dike siht bleich vnd rot·
so dvnket mich wie si mir ste vor den ougen·
so súfte ich mit lachendem mvnde also tǒgen·