ICh bin her bi minē ſtvndē·
ofte woꝛden mīne wunt·
da fúr han ich helfe funden·
deſ ſicht man mich wolgeſvnt·
ſwc dú mīne mir mit twīgē tůt·
da fúr hā ich arzenie dú iſt gv̊t·
Do dú mīne mir v̾wūdet·
mit ir ſtrâl das herze min·
dc hat ſchiere mir geſvndet·
miner frowē liehter ſchin·
ſwenne ich ſihe ir liehte varwe clar·
ſo ſint mir geheilet mine wūden gar·
Ich ſalbe mit vil ſvͤſſen ſalbē·
mine wūden hie vn̄ doꝛt·
in dem h̾zen allenthalben·
dú ſalbe iſt manig ſvͤſſes woꝛt·
dv́ vs miner frowē mvnde gant·
da vō mines h̾zen wūden ende hant·
Als ich balſen wil dú ǒgen·
h̾ze ſinne vn̄ den lip·
ſo gen ich ſvnd̾ lǒgē·
vn̄ ſihe an dc werde wip·
da vō wirt min lip ſa froͤiden ivng·
vn̄ mv̊s mir das h̾ze ſpꝛingē manigē ſpꝛung·
247r Vs ir klein vel rotem mvnde·
ſvͤſſe ſvͤſſe ſv̊ſſe gat·
dienimt ſi in h̾zē grunde·
der ſi da grôs wund̾ hat·
ſi iſt ſchoͤne reine gvͤtlich gv̊t·
es iſt lieplich ſvͤſſe gv̊t· ſwas ſi mir tůt·
Ich wolde dc ir liehtē ǒgen·
in min h̾ze moͤhtē ſehen·
da ſehe ſi der liebi tǒgē·
ſo dc ſi des mvͤſte iehen·
dc ſi mir iſt liep fúr ellú wip·
vn̄ fúr war vil lieb̾ dāne min ſelbes lip·
Got weiſ wol mir iſt ir ere·
lieb̾ danne dv́ ere min·
ir lip iſt min erē lere·
ich wil ir zedieneſt ſin·
ſvnder wenken al die wile ich lebe·
ſi iſt min troſt fúr trvrē vn̄ min froͤidē gebe·