Helfent gruͤſſen mir dē meiē·
der ſo lobelichē ſchoͤnet·
anger heide vf berg vn̄ in dem tal·
wir ſon tanzen ſpꝛingen reigē·
ſit d̾ walt iſt wol bedoͤnet·
da hant vogelin froͤiderichē ſchal·
velt vn̄ owe ſtent gebluͤmet·
manig ſvnd̾ varwe iſt da·
wiſ bꝛvn gel rôt gruͤne· weicvar bla·
da ſich nahtegal d̾ zit ī ſange ruͤmet·
Das dú nahtegal wol ſinget·
dc gebluͤmet ſtet dú heide·
des hab ich zefroͤide enkeine war·
ein froͤide in min h̾ze dꝛinget·
frîer h̾zen ǒgenweide·
vn̄ ouch libes ǒgen weident dar·
dú froͤid iſt ſo lieb ſo here·
dc ſi froͤit h̾ze vn̄ lip·
dc ſint ſchoͤnů mīneklichú wib·
nach d̾ froͤide ſīne ein man an der lit ere·
Ein wib ich zefroͤidē mīne·
mir zetroſte mir zeheile·
mir vúr alles vngemvͤte ein dach·
der vil reinē ſtetē ſinne·
frigent ſi voꝛ allē meile·
ſo dc ſi ir wibheit nie gebꝛach·
got hat wirde vn̄ ere beide·
ſeliclich an ſi geleit·
ſchone varwe niht vo gvnterpheit·
hat ir lieblich angeſiht min ǒgenweide·
Wol dien froͤidegebendē wibē·
die mit zuht in hohgemvͤte·
wiblich mānes froͤiden ſpiegel ſint·
wol ir reinē ſuͤſſen liben·
wol ir rehtē wibes gvͤte·
da vō lāges trurē ſa v̾ſwint·
wibes gvͤte heilet ſmerzē·
der vns dike nahe lit·
wibeſ gvͤte vns rehte froͤide git·
wibes gvͤte iſt heiles hoꝛt in mānes h̾zen·