Heide vn̄ anger·
wēt niht lang̾
blv̊m̄ tragē·
nv ſtet blos d̾ gruͤne walt·
kalte wīde·
went geſwīde·
hin v̾iagē·
leider lǒbes vngezalt·
rife vn̄ ǒch d̾ kalde ſne·
ſelwent beide·
gruͤne heide·
ſum̾ kleide·
túnt ſi leide·
vn̄ den kleinē vogelī we·
Sv̊ſſe gruͤſſe ſint ſo gůt·
ſwa liep tǒgē·
vnder ougē
blikē tůt·
Ach ich tūber groſſer kvmb̾·
tůt mir leit·
da vō bin ich vngemv̊t·
ach wie we dc ſelbe tůt·
wc klage ich d̾ blv̊men ſchin·
ſit ich woꝛgē·
mv̊ſ in ſoꝛgē·
manigē moꝛgē·
vnv̾boꝛgē·
vō der liebē frowē min·
Suͤſſe gruͤſſe ſint ſo gůt·
ſwa liep tǒgē·
vnder ougē
blikē tůt·
Sit die mine
ſtarkē pine·
m̾ent ſich·
vn̄ min froͤide ſwindē wil·
vn̄ dú reine·
harte kleine·
troͤſtet mich·
dc iſt mir ein hertes ſpil·
we wie ſol ich fro beſtan·
ſit dú h̾e·
mir niht lere·
git vúr ſere·
ſwar ich kere·
da vō mv̊s ich kvmb̾ hā·
Suͤſſe gruͤſſe ſint ſo gůt·
ſwa liep tǒgē·
vnder ougē
blikē tůt·
Wie mich wūd̾t·
ſehe ich hvnd̾t
tuſēt wib·
mir geviele enkeine bc·
dāne dú gůte
wol gemv̊te·
ſchoͤnē lip
hat dú liebe wiſſēt dc·
ich geſach nie reiner fruht·
ſi kan machen·
froͤlich lachē·
trvren ſwachē·
bi dē ſachen·
hat min frowe wiblich zuht·
Suͤſſe gruͤſſe ſint ſo gůt·
ſwa liep tǒgē·
vnder ougē
blikē tůt·
Ungewīne·
mir dú mīne·
dike git·
da vō habe ich vngewī·
ſwc ich ſinge·
vngelīge·
nimet mir min froͤide hin·
mīne gib mir ſuͤſſē troſt·
la die reinen·
valſches einē·
lieplich meinē
mir beſcheinē·
ſo wird ich d̾ not erloſt·
Sv̊ſſe gruͤſſe ſint ſo gůt·
ſwa liep tǒgē·
vnder ougē
blikē tůt·