Heide mit kleide· zieret sich gar ane we·
wunnen me·
bringen vns der meie wil·
schoͤne· gedoͤne· singent vogellin als ê·
durh den kle·
dringet liehter blůmen vil·
walt dar vnder· wunder· lǒber an sich leit·
dc gevilde· wilde· rote rosen treit·
die sint maniges herzen spil·
Gruͤssen· mit svͤssen· doͤnen sol man aber die zit·
wan si git·
wunne vil an allen wanc·
minne die sinne· froͤit so dú heide wit·
schone lit·
wib nv machent truren kranc·
sendem manne· danne· wibes minne froͤide birt·
so der wase· grase· gruͤne tragende wirt·
blv̊men rot gel vnd blanc·
Schowen· die frowen· sol man fúr die rosen rot·
sende not·
buͤsset reiner wibe lib·
stúre gehúre· wibes minne ie manne gebot·
froͤide ist tot·
ane minneklichú wib·
dem niht schoͤne· loͤne· git der wibe trost·
...
wib sint mannes leit vertrib·