Hat iemā leit alſ ich es han·
nein iſt es als ich mich v̾ſinne·
ſaget an wie iſt úw̾ leit getan·
ſeht da v̾derbet mich dv́ mīne·
wie mag úch v̾derbē dc niemā geſach·
gedāke vuͤgent wol vngemach·
iſt im dāne alſo·
ia ich wurde noh vō h̾zē lieb̾ m̾e vꝛo·
Wer kan alſolhú merú ſagē·
dú ir went han vúr libú mere·
dc ſtan dú mir nie half getragē·
min leit wā ſi dc ichz v̾bere·
wer hat v̾ch betwūgē vf die ſelben not·
dc hat d̾ ſchonē gvͤte vn̄ ǒch ir mvnt ſo rot·
wc kan dc v̾van·
leid̾ lihte niem̾ niht· ſo habe ich doh den liebē wan·
IR mvgēt wol wenē ſwes ir welt·
ich entroͤſtú niht dc es v̾uâ·
min wā iſt noh niht vs gezelt·
dar zv̊ get mir min lieb zenâ·
es vert lihte es iſt húre verrer dāne vert·
we wie w̾e ich dāne ane liebe leides ſo gewert·
alſ ǒch māger ê·
nein dē was nah liebe niht ſo h̾zekliche we·
Iſt halbes war dc ir da klaget·
ſo iſt úw̾ vngemach doch niht kleine·
eſ iſt gar als ich iv han geſaget·
ir ſit die ich da vō h̾zē meine·
dar vmbe tv̊n ich niht wā deſ ich tete doch·
wc ob ir úch vil lihte bc bedenket noch·
warvmbe tet ich dc·
dvr dc ir an d̾ w̾lte an nihte niemer me getetent bas·
Es dúhte úch lihte bas getan·
dāne ich mich gv̊tes dꝛan v̾ſinne·
alſolhē zwiuel ſvlt ir lan·
welt ir behaltē gottes mīne·
die wil ich behaldē gerne wiſent wie·
da hant lieb dē der úch vō h̾zen mīnet ie·
nein deſ bas v̾boꝛn·
ſwer niht mīnet d̾ in h̾zecliche mīnet der iſt v̾loꝛn·