Gvͤtlich ſol ein iegſlich wib·
gerne tún deſt war dc wibet wol·
div wol kleiden wil ir lip
dv́ ſol tv̊n ir h̾ze gvͤte vol·
Gvͤte iſt ein dc beſte wibeſ kleit·
dc an frowen lip ie wart geleit·
Swelh wip guͤtlich lachē kan·
ſchone mit zúhten hat dv́ rotē mvnt·
dv́ mag einē werden man·
ſúftē bꝛingen vs deſ h̾zen grunt·
gůt geberde frowē ſchone ſtat·
wol ir dv́ bi gvͤte ſchoͤne hat·
Swa ein gv̊t wip mīnen wil·
dv́ ſol minnē dc ir rehte zeme·
valſcher māne iſt nv vil·
da vō ſol ſi denkē wen ſi neme·
d̾ ir eren hvͤte vn̄ ſtete ſi·
ſo dc er gegen ir ſi wankeſ vꝛi·
Swelh man ſich voꝛ miſſetat·
hat behv̊t vn̄ iemer hvͤten wil·
ſwa ein wip ſich an den lat·
d̾ lip darf boꝛgē niem̾ vil·
erſt vil eren fro dc weis ich wol·
bederbe man gv̊t wib bedenkē ſol·
Ein gv̊t wip dv́ ſolde die·
habē lieb die manlich ſint gemv̊t·
ſwer nie gros vntat begie·
der iſt w̾dē wibē ze froͤidē gv̊t·
ſwelh man ſiner erē hvͤten kan·
an den ſol ein wib ir ere lan·
Swes min frowe ſich an mich lat·
deſ pflige ich ir ſo ich beſte kan·
ich begie nie miſſetat·
gegē ir ich nie velſchen mv̊t gewā·
ſi iſt mir lieb danne min ſelbes lip·
dc iſt min reht ſi iſt ein wiplich wip·