Gv̊ter wahter wis·
dv merke wol die stunt·
so dú wolken verwent sich·
vnd werdent gris·
die zit tů mir kvnt·
sprach ein frowe minneklich·
warne ob ich entslafen bin·
so dc ritter vor der argen hv̊te kome hin·
kv́se den morgen sternen
sang der kleinen vogellin·
ich were gerne
langer hie des mag niht sin·
er liebet wol dem herzen min·
Der wahter schiet·
oben vf die zinne dan·
do der tag dú wolken spielt·
ein tage liet·
in der wise vieng er an·
selde 350r ir beider maze wielt·
troie wart zerstoͤret· ê
tristran dem von minne dur ysalden dike we·
noch hat minne werden
man· der wirbet frowen grůs·
dem sol er werden
ob ich alsvs warten mv̊s·
es ist vor tage niht einen fůs·
Dú liebe entslief·
wan si wc vermvͤdet so·
dc dú frowe zv̊ dem man
sich vmbe swief·
wachte da dú minne do·
so kvmt der ritter wol von dan·
minne lach vnminne habe·
vn minne entslús dv minne tů· dc slos mit fůgen abe·
dú zit meldet melde·
kvmt dú selten ie gelag·
an minnegelde·
hat vn minne noch ir beiag·
nv wol vf ritter es ist tag·