Gegen der liehten svmerzit·
heide lit·
mit vil manigen blv̊men wnnenklich gevar·
da bi singent vogellin·
svͤsse doͤne manigvalt·
ivnge vnd alt·
froͤiwent sich der liehten svmer wnne gar·
nv mv̊s ich in sorgen sin·
swie dú heide stet geblv̊t·
doch besweret mir den sin·
dc ich bin·
ane gv̊t·
dar an lit vil gv̊t gewin·
Het ich gv̊t so froͤit ich mich·
lobelich·
ist dc gv̊t des ich ze dirre welte ger·
wan es bringet froͤiden vil·
wib vnd ere ich meine gv̊t·
hohen mv̊t·
fuͤgent disú beide seht des bin ich wer·
da bi maniger hande spil·
svnder ere vnd ane wib·
alles gv̊t ist gar ein wiht·
swa man siht·
wibes lib·
was da gv̊tes von geschiht·