Gegen der liehten ſvmerzit·
heide lit·
mit vil manigen blv̊mē wnnenklich gevar·
da bi ſingent vogellin·
ſvͤſſe doͤne manigvalt·
ivnge vn̄ alt·
froͤiwent ſich der liehten ſvmer wnne gar·
nv mv̊s ich in ſoꝛgen ſin·
ſwie dú heide ſtet geblv̊t·
doch beſweret mir den ſin·
dc ich bin·
ane gv̊t·
dar an lit vil gv̊t gewin·
Het ich gv̊t ſo froͤit ich mich·
lobelich·
iſt dc gv̊t des ich ze dirre welte ger·
wan es bꝛinget froͤiden vil·
wib vn̄ ere ich meine gv̊t·
hohē mv̊t·
fuͤgent diſú beide ſeht des bin ich wer·
da bi maniger hande ſpil·
ſvnder ere vn̄ ane wib·
alles gv̊t iſt gar ein wiht·
ſwa man ſiht·
wibes lib·
was da gv̊tes von geſchiht·