Frowe tů des ich dich bitte·
dc ich iemer si·
dines heiles fro·
dv solt lassen einen sitte·
da lit wandel bi·
we wie tůst dv so·
dc 105v dv als vngenedeg bist·
ia erkennest dv vil wol das dir nieman holder ist·
Froͤi mit rede dc herze min·
troͤste mir den lib·
ia verdiene ichs wol·
mvge es vor lieben niht gesin·
so solt dv selig wib·
dvr ein wunder dol·
ê ich din abe gestê·
ian ist in der werlde so gůtes niht ich enverspreche es ê·
Mich froͤit an alle swere wol·
dc ich so liebiv mere han vernomen·
der ich mich gerne troͤsten sol·
mir ist der mvot von grossen sorgen komen·
sit man der stête mac geniessen·
so ensol ir niemer mich verdriessen·
min herze ist ir mit trúwen bi·
freisch aber es dú schone dc es mit valsche si·
so lâsse si mich iemer mere fri·