Frǒwe schoͤne frǒwe reine·
frowe selig frǒwe gůt·
ich wene ivch dú minne kleinne·
mvͤt des sit ir hohgemv̊t·
wirt iv minne twingen kvnt·
úwer kleine vil rôter mvnt·
lernet súften an der stvnt·
Herre sagt mir wc ist minne·
ist es wib oder ist es man·
des en wart ich noh nie inne·
sagt an wie ist es getan·
das sult ir mir kúnden gar·
wie es si vnd wie es var·
dc ich mich vor im bewar·
Frǒwe minne ist so gewaltig·
dc ir dienent ellú lant·
ir gewalt ist manigvaltig·
ich tv̊n iv ir sitte bekant·
si ist úbel si ist gv̊t·
wol vnd we si beide tůt·
seht also ist si gemv̊t·
Herre kan dú minne swenden·
truren vnd ǒch sendú leit·
hohgemv̊te in herze senden·
fuͤgen zuht vnd werdekeit·
hat si alles des gewalt·
als ich iv han vor gezalt·
so ist ir selde menicvalt·
Frǒwe ich wil iv von ir mere·
sagen ir lon ist wunneklich·
si git froͤide vnd git ere·
si tůt hoher tvgenden rich·
ǒgen wunnen herzen spil·
git si swem si lonen wil·
dar zv̊ hoher selden vil·
Herre wie sol ich verschulden·
ir lop vnd ir habedanc·
sol ich kvmber da von dulden·
da ist min lip zv̊ gar zekranc·
leides mag ich niht getragen·
wie sol ich ir lon beiagen·
herre dc svlt ir mir sagen·
Frǒwe da solt dv mich meinen
herzeklichen als ich dich·
vnser zweien so vereinen·
dc wir beide sin ein ich·
wis dv min so bin ich din·
herre des mag niht gesin·
sit ir úwer ich bin min·