Frowe ich rede es mit úwern hulden·
sit ich úch alrerst sach·
ine weis von welhen schulden·
lide ich vil gros vngemach·
dc mir von gedanken so we nie geschach·
wies mir solte ergan
von der liebe die ich han·
gegen iv frowen der mag ich niht lan·
Von úwern ǒgen dur dú minú·
gie mir in dc herze min·
ein so wunneklicher schine·
der mv̊s iemer drinne sin·
ine gesach nie von wibe so gvͤtlichen schin·
vnd ir gvͤte dabi·
sit dis alles da si·
frowe genade so la mich vri·
Nieman kan es ú verkerin·
bin ich verwer eigen man·
es stat wol nach úwern eren·
ob ich iv wol heiles gan·
vnd ich iv wol gerne diene so ich beste kan·
ob ich das tv̊·
beide spate vnd frů·
gegen iv frowe da hoͤret genade zv̊·