Froͤit úch minnegernde man·
der vil wunnebernden svmer zit·
froͤit úch das ist wol getan·
wisset dc ú froͤide wirde git·
hohgemv̊tes mannes ivgent·
minnet werdes wibes tvgent·
Wib sint reine wib sint gv̊t·
wib sint lieber danne iht dinges si·
wib sint schoͤne vnd wolgemv̊t·
wib sint aller missewende vri·
wib sint gv̊t fúr sendiv leit·
wib dú fuͤgent werdekeit·
Iemer mvͤsse selig sin·
ir vil eren rich werder lib·
ia meine ich die frǒwe min·
so vil reine svͤsse selig wib·
si ist noh besser danne gůt·
schoͤne da bi wolgemv̊t·
Wol mich dc ichs ie gesach·
wol mir des dc ich ir dienen sol·
wol mir dc ich nie gebrach·
min stete an ir dc tv̊t mir wol·
mir tv̊t wol ir werdekeit·
die man von ir gvͤte seit·
Got si mir als ich ir si·
got der mvͤsse ir manege froͤide geben·
got der tv̊ si leides vri·
got lasse mich die zit geleben·
dc mir also wol geschehe·
dc si min zefrúnde iehe·