Flúch flúch truren von vns verre·
vs dem lande balde·
hoher mv̊t din rehter herre·
der kvmt mit gewalde·
ivnge vnd alde·
hebt vnhohe swar dv kerest·
sit dv nieman erest·
Hoher mv̊t der bringet ere·
vns von wibes gvͤte·
er ist aller tvgenden lere·
got in vns behuͤte·
hohgemvͤte·
leret 246r frowen dienen schone·
nach ir svͤssem lone·
Wil ein frowe schoͤne beliben·
gerne steteklichen·
dú sol sich mit guͤte riben·
stete vaste vnderstrichen·
eren richen·
mv̊s si von den varwen iemer·
si verderbent niemer·
Wib vnd frowen in einer wete·
sol man gerne schowen·
swa ein frowe vnwiplich tete·
wer moͤht der getrowen·
werden frowen·
stat wol dc si gvͤtlich guͤten·
vnd ir eren huͤten·
Gv̊ten wiben wil ich iemer·
dienen svnder wenken·
von dem mv̊te kvm ich niemer·
wie moͤht ich gedenken·
si ze krenken·
sit an in stat al min ere·
vnd an nieman mere·
Min lip mv̊s von einem wibe·
hoher froͤiden richen·
ir vil reinem svͤssem libe·
kan ich niht gelichen·
endelichen·
si ist dv́ beste in minem mv̊t·
vnd fúr war dv gůte·
IN des herzen grunde schone·
bluͤt mir hohgemvͤte·
dc git mir ir lip ze lone·
mit ir svͤssen gvͤte·
got behvͤte·
mir ir lip ir schoͤne ir ere·
si ist miner froͤiden lere·