Es sint manger hande doͤne·
die da liebent gv̊ten mv̊t·
dar vs ich ir einen kroͤne·
der dem herzen sanfte tůt·
minneklichú rede ist gv̊t·
von den reinen wiben schoͤne·
die tv̊nt sendú herzen frůt·
Mir tůt bas in minen ǒgen·
gvͤtú wib danne anders iht·
weder offenbar noch tǒgen·
nieman besser wunne siht·
min herze allen wiben giht·
es si war vnd ane lôgen·
niemer si so gv̊tes niht·
Wib sint gv̊t in mangen enden·
schoͤne vnd da bi tvgenden vol·
es begreif nieman mit henden·
dc dem herzen tv̊ so wol·
swer ein gv̊t wib trůren sol·
der kan bessers niht verenden·
minne git da svͤssen zol·