Es sint guͤtú núwe mere·
dc die vogel offenbere·
singent da man die blůmen siet·
ze den ziten in dem iære·
stvͤnde wol das man vro were·
leider des enbin ich niet·
min tvmbes herze mich verriet·
dc mv̊s vnsanfte vnd swere·
tragen dc leit das mir beschiet·
Dú schoͤnste vnd dú beste frǒwe·
zwischen dem rotten vnd der sǒwe·
gab mir blideschaft hie bevorn·
das ist mir komen al ze rǒwe·
von tvmbheit vnd von trǒwe·
das ich ir hvlde han verlorn·
die ich ze der besten hat erkorn·
oder in der welte ieman schǒwe·
noch sere fúrht ich ir zorn·
Alzehohe minne·
brâhten mich vs dem sinne·
do ich ir ǒgen vnd mvnt·
sach wol sten vnd ir kinne·
do wart mir das herze en binne·
von suͤsser tvmbheit wnt·
dc mir wisheit wart vnkvnt·
des bin ich wol worden inne·
mit schaden sit ze maniger stvnt·
Das úbel wort si verwâten·
das ich nie kvnde verlâten·
do mich betrǒg min tvmber wan·
der ich was gerende vs der mâten·
ich bat si in der caritaten·
das si mich mvͤs al vmbe van·
so vil het ich niht getan·
dc si ein weninc vs straten·
dvr mich zevnrehte wolte stan·