Es iſt ein ſpot·
wart ie hertze von leide verſeret
ſam das mine minne das iſt din getat
ich bin ir ſot·
ſus hat ſi mir die ſinne verkeret·
wiſſint das ſi mich gar ze ſtrenchlichen hat·
ich můs eigen ſin·
ſwie ſi wil dú frǒwe min·
ach rich̾ got hat ſi minne den zůber geleret·
moͤcht ich den zerbꝛechen min wurde gůt rat·
Si ſcherzet mich
vnde leit mir ze koſtliche ſtúre·
dar zv̊ můs ich ſingen· wie lieplich ſi ſi·
ſi iſt minneklich·
vn̄ geſtellet ze ſehenne gehúrē·
ſwem ſi miſſe vêllet d̾ iſt ǒgen vrî·
in geſach nie wip
han ſo gernde gernden lip·
ſi ſcherzet ſich
michels richer an guͤte noch húre
alſus dicke wachſent ir tugende bi·
Uil ſender no
hat dv́ minne ze pfande geſetzet
mir vil ſênden der ſi nit loſen enwil·
ich bin· e· tot
eſi mich mines dienſtes· vrgêtzet·
wan d̾ miner ſoꝛgen iſt leider ze vil·
ſo bin ich nit wert
des min hertze· von ir gert
ir múndel rot
hat mich an ſi mit dienſte gehetzet·
vn̄ iſt doch min wan vnd min lon ane zil·