Eregernden ritter lat úch schǒwen·
vnder helmen dienen werden frowen·
welt ir die zit vertriben·
ritterlich eren rich·
wert ir von gv̊ten wiben·
IR svlt hohgemv̊te sin vnder schilde·
wol gezogen kv́ne blide milde·
tůt ritterschaft mit sinnen·
vnd sint fro· minnent ho·
so mvgt ir lop gewinnen·
Denkent an der werden wiben gruͤssen·
wie sich dc kan gv̊ten frowen svͤssen·
swen frowen mv̊t wol gruͤsset·
der ist gewert· swes er gert·
sin froͤide ist im gesvͤsset·
Swer mit schilden deken wil vor schanden·
der sol es dem libe vol enblanden·
des schiltes ampt git ere·
im ist bereit· werdekeit·
si mv̊s aber kosten sere·
Manlich herze vindet man bi schilde·
zaglich mv̊t mv̊s sin dem schilde wilde·
gegen wiben valsch der bleket·
swer in hat· an der stat·
da man mit schilden deket·
Tv̊ her schilt man sol mich húte schǒwen·
dienen miner herzelieben frowen·
ich mv̊s ir minne erwerben·
vnd ir grůs· ob ich mv̊s·
gar in ir dienest sterben·
ICh wil si mit dienest bringen inne·
dc ich si bc danne mich selben minne·
vf mir mv̊s sper erkrachen·
nv̊ tůt her· mir dc sper·
des twinget mich ir lachen·