Er hat ze lange mich gemitten·
den ich mit trúwen nie gemeit·
von siner schvlde ich han erlitten·
dc ich nie grosser not erleit·
so lebt min lip·
nach sinem libe·
ich bin ein wib·
dc im von wibe·
nie liebes nie geschach·
swie mir von im geschêhe·
min ǒge in gerner nie gesach·
danne ich in húte sehe·
Mir ist vil liebe nv geschen·
das mir so liebe ne geschach·
so gerne han ich si gesehen·
dc ich si gerner nie gesach·
ich scheide ir můt·
von swachem mv̊te·
si ist so gv̊t·
ich wil mit gůte·
ir lonen ob ich kan·
als ich doch gerne kvnde·
vil mere vroͤiden ich ir gan·
danne ich mir selben gvnne·