Eins meien moꝛgens frů·
wc ich vf geſtan·
in ein ſchoͤns bǒngartegin·
ſolde ich ſpiln gan·
da vant ich dꝛîe ivncfrǒwē ſtan·
ſi warē ſo wolgetan·
dú eine ſang fúr dv́ ander ſang na·
harba loꝛi fa· harba harba loꝛi fa· harba loꝛi fa·
Do ich erſach das ſchone krut·
in dē bǒngartegin·
vn̄ ich erhoꝛde dc ſvͤſſe gelvt·
vō den megden fin·
do verblide dc h̾ze min·
das ich mv̊ſte ſingē na·
Harba loꝛi fa· harba harba loꝛi fa· harba loꝛi fa·
Do grůſte ich die aller ſchoͤnſtē·
dú dar vnder ſtůnt·
ich lies min arme alvmbe gan·
do zer ſelben ſtunt·
ich wolde ſi kúſſen an irn mvnt·
Si ſpꝛach lat ſtan lat ſtan lat ſtan·
Harba loꝛi fa· harba harba loꝛi fa· harba loꝛi fa·