Ein altú voꝛ den reien trat·
dv́ mer danne tvſent runzen hat·
ſi ſpꝛach tohter hvͤte da heime wol·
ich bin woꝛden froͤidē vol·
Mv̊ter wie iſt ú geſchehē·
wc habt ir húre hie geſehē·
nv iſt ſin mer danne fúnfzec iar·
das ir trůget grawes har·
Si ſwanc ſich vf reht als ein vogel·
ia wil ich húre ſin vil gogel·
ſeht an mine ſiten ivng·
dú tůt manigē geilen ſpꝛvng·
Tohter nv hvͤte mir der túr·
vn̄ ſa mich ſpꝛingen wider vn̄ fúr·
vnde nim des knappē tǒgen war·
der da treit das valwe har·
Mv̊ter ich wil úch v̾trettē·
ein húbeſcher man hat mich gebettē·
der kúrzet vns die wile lanc·
her Nithart diſē reien ſanc·