Ein altú dv́ begvnde springen·
hoh alsam ein kitz enbor
si wolde blv̊men bringen·
tohter reich mir min gewant·
ich mv̊s an des knappen hant·
der ist von rúwental genant·
Traranvretvm traranvrirunt vnd eie·
Mv̊ter ir huͤtet úwer sinne·
er ist ein knappe so gemv̊t·
er pfliget niht steter minne·
Tohter lat ir mich annot·
ich weis wol was er mir enbot·
nach siner minne so bin ich tot·
Traranvretvm traranvrirunt vnd eie·
Do sprach es ein altú in ir geile·
trut gespil wol dan mit mir
ia ergat es vns zeheile·
wir svln beide nach blv̊men gan·
warvmbe solt ich hie bestan·
sit ich so vil geverten han·
Traranvretvm traranvrirunt vnd eie·