Dú zit ist so wol gestalt·
wan siht dur das gras vf dringen·
viol vnd rosen rôt·
dabi lǒbet vns der walt·
so hoͤrt man die vogel singen·
sv̊sse als in dú zit gebot·
in dem svͤssen touwe
gegen der svnnen schin·
glenzet manig bluͤmelin·
in der wunneklich anschǒwe·
sol dú werlt in froͤiden sin·
Min gemvͤte swebet ho·
do dú minne mine frowen·
lieblich in min herze slos·
ich was ir zesehen vro·
do ich dar begunde schowen·
des vil wenig mich verdros·
svs lies ich sich weiden·
minú ǒgen dar·
div mit froͤiden nâmen war·
der vil lieben niht der leiden·
dú ist alles wandels bar·
Minne frowe erkenne dc·
dc ich in so stêtem herzen·
vnd in trúwen minne ein wib·
der ich selten nie vergas·
swie dc mir doch fuͤget smerzen·
ir vil seldericher lib·
svͤsse minne swache·
mir die selben not·
wende ǒch miner froͤiden tot·
hilf dc mir in liebe erlache·
erloͤschet ir mvnt so rôt·
Solt ir roͤselehter mvnt·
vnd ir minnekliches gruͤssen·
lachelichen meinen mich·
so vunt ich der selden vunt·
an der minneklichen svͤssen·
gienge es mir so seleclih·
ach dc dv́ vil gůte·
solte bi mir sin·
tǒgen nach dem willen min·
vnz ich gar nach minem mv̊te·
daht ir roten múndels schin·
Swer ein lieb in herzen hat·
tǒgenlichen wol verborgen·
der ist seleclich gewert·
ob er valsches triegen lat·
vnd in trúwen kan besorgen·
ob er rehter liebe gert·
er sol ane wanken·
herzeliebes gern·
vnd vnsteten mv̊t verbern·
kan er liebe lieplich danken·
minne wil in liebes wêrn·