Dú svͤssen wort dú habent mir getan·
dú ir die besten algemeine·
sprechent dc ich nien kan·
gedenken wan an si alters eine·
ander min angest der ist kleine·
wan den ich von ir han·
got weis wol dc ich nie gewan·
in al der werlte so liebe enkeine·
des sol si mich geniessen lan·
Swes got an gvͤte vnd an getat·
noch ie dekeiner frowen gvnde·
des gihe ich ime dc er dc hat·
an ir geworht als er wol kvnde·
was danne vnd arnez vnderstunde·
min herze es dike hohe stat·
noch moͤhte es alles werden rat·
wolden si die grossen wnde·
erbarmen die si an mir begat·
Swes got an frowen allertagen·
des enkan mir an ir nieman gemeren·
wan als ich ir mv̊s min angest sagen·
dc kan si leider wol verkeren·
ein herte herze kan sis leren·
das also lihte mac vertragen·
so grôsses wuͤfen vnd klagen·
dc ich lide vmb ir hulde mit seren·
dc ich niemer mac getragen·