Dú frowe gůt·
súfte vnd kvst ir lieben man·
der hohgemv̊t·
sprach gůt frowe wolgetan·
der tac ist hoh vf ich kan niht komen hinne·
macht dv mich verbergen iender hie inne·
dc ist min rat vnde ouch min ger·
Vnde moͤht ich dich·
bergen in den ǒgen min·
frúnt dc tet ich·
dc kan leider niht gesin·
wil dv hie in dirre kemenat beliben·
disen tac mit froͤiden wol vertriben·
dar inne ich dich wol verhil·
Dv birge mich·
swie dv wilt vil schones wip·
doch so dc ich·
svnder wer iht lasse den lip·
wirt min ieman inne so solt dv mich warnen·
kvm ich ze wer es mv̊s sin lip erarnen·
der mich mit striite niht verbirt·
Svs wart verspart·
der vil manlich hohgemv̊t·
vnd wol bewart·
von der reinen svͤssen gv̊t·
wie pflag sin den tag dú svͤsse minnekliche·
so dc er wart hohes mv̊tes riche·
so kvrzen tac gewan er nie·
Dú naht kam do·
sa hv̊b sich der minne spil·
svs vnde so·
wart von in getrútet vil·
ich wene ie wibe wurde bas· mit liebem manne
danne ir wc· owe do mv̊s er dannen
da von so hv̊b gros iamer sich·
Vrlob genomen·
wart mit kússen an der stvnt·
schier wider komen·
bat in 244r ir roter mvnt·
er sprach ich tůn dv bist miner froͤiden wunne·
mins herzen spilndv́ meýen svnne·
min froͤiden geb min selden wer·