Die ich mir ze frowen hatte erkorn·
da vant ich niht wan vngemach·
was ich gůter rede han verlorn·
ia die besten die ie man gesprach·
si was endelichen gůt·
nieman konde si von lúge
gesprochen han· ern hette als ich getrúwen mv̊t·
Kem ich nv von dirre not·
ich enbegvnde es niemerme·
volge ichs lange es ist min tot·
ia wen ich michs gelǒben wil es tůt ze we·
owe leider ich enmag·
swenne ich mich von ir scheiden mv̊s
dast an minen froͤiden mir ein angeslicher tag·
Mich wunderet sere wie dem si·
der vrǒwen dienet vnd dc endet an der zit·
da ist vil gv̊t gelúke bi·
owe dc mir der selden nieman eine git·
warzv̊ sol ein vnsteter man
dc was ich ê· nv bin ichs niht·
ǒch enwart ichs niemerme sit ich dienen 108r ir began·
Vroͤide vnd alle selikeit·
het ich genv̊g der mich si niht wan liesse sehen·
mir enmag ein herzeleit·
noh grosse liebe niemer ane si beschehen·
svst vnd so swie ich danne mag·
so lebe ich als ein ander man
dc ich dú zit vertribe vnd etlichen sweren tag·
Ich weis manigen gv̊ten man·
an dem ich nide dc in so gerne siht·
dvrh dc er wol sprechen kan·
doch troͤste ich mich des einen si engehoͤret niht·
vnd engetet dis lange iar·
wil si aber eines rede vernemen
so liegent si alle vnd han ich war·