Des tages do ich dc krúze nam·
do hůte ich der gedanken min·
als es dem zeichen wol gezam·
vnd als ein rehter bilgerin·
do wande ich sie ze gotte also besteten·
dc si iemer fůs vs sime dienste mer getreten·
nv wellent si aber ir willen han· vnd ledekliche varn als ê·
dú sorge dú ist min eines niet· si tůt ǒch mere livten we·
Noch fuͤre ich aller dinge wol·
wan dc gedanke wellent toben·
dem gote dem ich da dienen sol·
den enhelsent si mir niht so loben·
als ichs bedorfte vnd es min selde were·
si wellent noch alles wider· an dú alten mere·
vnd wen dc ich noch froͤide pflege als ich ir eteswenne pflac·
dc wende mv̊ter vnde maget sit ichs in niht verbieten mac·
Gedanken nv wil ich niemer gar·
verbieten des ir eigen lant·
in erlǒbe in eteswenne dar·
vnd aber wider sa ze hant·
so si 103v vnser beider frúnde dort gegruͤssen·
so keren dan vnd helfen mir die sv́nde buͤssen·
vnd si in alles dc vergeben· swas si mir haben her getan·
doch fúrhte ich ir betrǒgenheit dc si mich dike noch bestan·
So wol dir froͤide vnd wol im si·
der din ein teil gewinnen mac·
swie gar ich din si worden fri·
doch sach ich eteswenne den tac·
dc dv uber naht in miner pflege were·
des han ich aber vergessen nv mit maniger swere·
die stige sint mir abe getretten· die mich da leiten hin an dich·
mirn hulfe niemen wider ze wege ern hête minen dienest vnd ǒch mich·