Der scharle hat drú spil fúrpflicht·
swer der keins verlúret· des leben ist ein wiht·
es gilt den lip vnd anders niht·
des wil das lant cecilie bv́rge sin·
das erste spil ist buf genant·
das verlor der prinz er brach die bvnde sa zehant·
des gab er leben vnd lant·
das ander spil verlos kv́nig kv̊nradin
das heiset wol von hǒbt ǒwe·
wan das verklagt er niemer me·
ze dem dritten spil so ist kv́nig 293v Rv̊dolf nit ze gâch·
es mag wol heissen hakka nach·
ich wên der scharl kvnne es ime zevil·
Ich bin an minnen worden las·
dar vmbe tragent schone frǒwe mir ir has·
nv tete ich gerne vnd moͤhte ich bas·
den willen het ich an dem herzen wol·
nv hab ich einen frv́nt der lît·
die wile der stv̊nt do hat ich niht der frǒwen nît·
nv lat er mich ze vnrehter zît·
er stilt sich ein halb abe so er vehten sol·
sin hoher mv̊t der ist gelegen·
er wil ǒch nit me sin ein degen·
moͤchte ich nv win vnd gv̊te spise han·
so wolt ich doch nit abe lan·
ich svnge ein liet der lieben frǒwen min·