Der mit gelúke truric ist·
der wirt mit vngelúke selten gemelliche fro·
fúr truren han ich einen list·
swas mir geschihet zeleide so gedenke ich iemer so
nv la varn es solte dir geschehen·
schiere kvmt·
dc dir gefrumt·
svs sol ein man des besten sich versehen·
Swer anders giht der misse seit·
wan dc man stetú wib mit stetekeit erwerben mv̊s·
des hat mir min vnstetekeit·
ein stetes wib verlorn dv́ bot mir also schonen grůs·
dc si mir ǒgte lieben wan·
do si erkos·
mich stetelos·
do mv̊se ǒch dú genade ein ende han·
Es ist mir iemer mere gv̊t·
dc min vnstete an froͤiden mich versvmet hat·
nv kere ich mich an steten mv̊t·
vnd mv̊s mit heile mines vngelúkes werden rat·
ich bin einer steter vndertan·
an der wirt schin·
dú stete min·
vnd dc ich an stete meister nie gewan·