Der biber ist rilicher vil danne genv̊ge herren schinen·
so man in iaget so kan er sich vf hohe milte pinen·
dvr dc im verswinen· sorge vnd er habe zerflúhte pfliht·
er bîsset abe sin geil vnd lat es vallen zeiner miete·
vúr dc man in niht sv̊che mer in holze noch in riete·
we der edeln diete· dú niht an sine tvgende siht·
swen des gernden kvmber iage darvf er sich versinne wol·
dc er milteklichen zol· verrere an den geiegde·
ê man beginne sv̊chen in mit lastlicher klegde·
zen eren fliehe er sam der wilde ein húrne zeiner megde·
dvr ein krank getregde· laze er sich schande vahen niht·